《盡快樂个人》

關閉
  • 譯者徐登志
  • 配音羅乙心、羅宏昇

華語導讀

西恩找到快樂神,想成為最快樂的人。快樂神給他「願望成真」的能力,要他去到處幫助別人,西恩真的從此變得很快樂,直到他幫自己許了一個小小的願望……

客語故事內容

頭擺有一個人安到西恩,
佢想變做世界上盡快樂个人。
佢啉盡貴个酒,食盡好个東西,逐日搞牌,歸日跳舞,
毋過佢毋快樂。

有一日,西恩經過一間舊書店,
看着櫥肚有一本鑲金邊个書。
佢一打開書,一道金光箭出來,聽着耳公脣有人講:
「拿這本書跈𠊎行,𠊎會帶你尋着快樂神仙!」

西恩買好書,試着有一種力量,拉佢向前行,
行過烏樹林,跋上大尖山,水沖背後有一個磅空,
西恩行過磅空,發現石柱(chu+)頂坐一個老人家,
老人家頭那無毛又尖又圓,鬚生去長長長,長到廻石柱三輪(lin+)。

老人家講:「𠊎係快樂神,𠊎會分你變做一個盡快樂个人。
𠊎賜你祈(ki^)願个力量,毋過你使毋得替自家祈願哦,
單淨使得替別人祈願,若無啊快樂斯會走撇哦!」

玄玄風,神仙石碫做下毋見撇,斯聽着有一個細阿妹在河壩脣噭。
西恩問:「小朋友,你做麼个噭?」
細阿妹講:「吾狗毋見咧!」
西恩想:「𠊎來試看哪,看祈願个力量有靈顯無。」
佢斯目珠密密、頭那昂昂(ngong^),對天頂祈願:「分細阿妹个狗轉來!」

一隻細狗對草竇走出來,細阿妹揇緊細狗又唚又笑,
看着細阿妹恁快樂,西恩也跈佢快樂起來。
佢一下斯了解快樂神講个係麼个,
在這過後,西恩逐日同人𢯭手祈願。

佢分匱人有飯好食,失散个愛人團圓,細人做下平安,
尋佢𢯭手个人逐日排歸列,無閒濟借。
毋過西恩心肝有一個疑問:
「𠊎祈願个力量恁大,正經單淨同別人𢯭手忒等,使毋得為着自家?」

佢目珠密密來,祈願想愛一蕊花,
佢目珠擘開來一看,正經手項拿一蕊靚靚个蓮花。
原來,替自家許願也會實現!
佢當在該暢,玄玄風看着水肚有一蕊蓮花,比佢手項个加十倍恁大。

西恩想:「定著係𠊎祈个願忒細咧!
𠊎愛一座世界盡大个花園,裡背麼个花都有!」
一𥍉目西恩斯企在花海裡肚。

貪心像輾雪球,緊輾緊大,西恩毋單淨想愛盡大个花園,
佢還想愛變做盡有錢个人,權力盡大个國王。

這下西恩無時間過再同人𢯭手,
佢當無閒,驚有人偷厥花,偷厥錢,搶走厥王位!

佢食毋得,睡毋落,十分毋快樂。

西恩想:「吾快樂毋見咧!」
佢緊拚拚去尋快樂神,直直行到大尖山个水沖面前。

西恩對快樂神講:「請同快樂還𠊎!」
神轉身向前行,西恩逐過去,
面前好恬恬出現一大圃竻圃,
刺爛厥衫褲同手腳。

神走當遽,西恩逐去敨氣毋出,
佢看着一條細河壩,
西恩當嘴燥,想去河壩脣食水,
結果河壩水變做又烏又骯髒个瀝溝糜。

這滿西恩麼个願望都無,單單想愛有一口水好食。
一下佢試着一陣透心涼。
探(dam+)頭一看,有一個細阿妹同佢遮核日頭。
西恩認出來,斯係該個細狗毋見撇个細阿妹。

細阿妹拿一碗清水拿分佢,講:「來食啦!」
西恩咕嚕咕嚕一口斯食淨淨。
哇!較多个金錢,較大个王國,也比毋得這碗水个甘甜。

細阿妹毋見咧,神坐在厥面前,
神講:「係講你同快樂个道理傳出去,若个快樂斯久久還在(coi+)啊。」

西恩行過大城市細鄉鎮、山項田莊滿哪行透透,
同每一個想愛快樂个人講,仰脣追求快樂。
啊泥,西恩變做盡快樂个人。






【華語原文】

從前有個人叫西恩,
他想變成世界上最快樂的人。
他喝最貴的酒,吃最好的食物,不停玩牌,整天跳舞,
但是他並不快樂。

有一天,西恩經過一家舊書店,
看見櫥窗裡有一本鑲著金邊的書。
他打開書,一道金光閃出來,同時耳邊有人說:
「拿著書跟我走,我會讓你找到快樂神!」

西恩買了書,感覺有股力量,拉著他往前走,
穿過黑森林,爬上大尖山,瀑布後面有一個地道,
西恩穿過地道,發現石柱上坐著一個老頭,
老頭的頭頂無毛尖又圓,鬍子長長石柱繞三圈。

老頭說:「我是快樂神,我會讓你成為最快樂的人。
我賜給你許願的力量,但是你不能為自己許願,
只能為別人,否則快樂就會不見!」

忽然,神仙石階都不見,只聽見有個小女孩在河邊哭。
西恩問:「小朋友,你為什麼哭?」
小女孩說:「我的狗不見了!」
西恩想:「讓我來試試看,許願的力量靈不靈。」
於是他閉上眼,抬起頭,對著天空許願:「讓小女孩的狗回來!」

一隻小狗從草叢裡跑出來,小女孩抱起小狗又親又笑,
看到小女孩那麼快樂,西恩也跟著快樂起來。
他忽然明白快樂神說的是什麼,
從此以後,西恩天天幫人許願。

他讓窮人有飯吃,失散的愛人能團圓,孩子們都平安,
找他幫忙的人每天排一串,忙都忙不完。
可是西恩心中有一個疑問:
「我許願的力量這麼大,真的只能幫助別人,不能為自己?」

他閉起眼,許願想要一朵花,
然後他張開眼睛一看,果然手裡捧著一朵美麗的蓮花。
原來,為自己許願也會實現!
他正開心,忽然看見水中有朵蓮花,比他手上的大十倍。

西恩想:「一定是我許的願太小了!
我要一座世界最大的花園,裡面什麼花都有!」
一眨眼西恩便站在花海中。

貪心像滾雪球,越滾越大,西恩不只想要最大的花園,
他還想要變成最有錢的人,權力最大的國王。

現在西恩沒時間再幫助任何人,
他忙著害怕,怕有人偷他的花,偷他的錢,搶走他的王國!

他吃不下,睡不著,而且非常不快樂。

西恩想:「我的快樂不見了!」
他急忙去找快樂神,一直跑到大尖山的瀑布前。

西恩對快樂神說:「請把快樂還給我!」
神轉身往前跑,西恩追過去,
前面忽然出現一片荊棘,
刺破他的衣服和手腳。

神跑得很快,西恩追得喘不過氣,
他看見一條小河,
西恩口好渴,想到河邊喝口水,
結果河水變成又黑又髒的爛泥。

這時西恩什麼願望都沒有,只想有一口水喝。
忽然他感覺一陣清涼。
抬頭一看,有個小女孩幫他擋住陽光。
西恩認出來,就是那個走丟狗的小女孩。

女孩把一碗清水遞給他,說:「喝吧!」
西恩咕嚕嚕的,一口氣把水喝完。
哇!再多的金錢,再大的王國,也比不上這碗水甘甜。

女孩不見了,神坐在他的面前,
神說:「只要你要把快樂的道理傳出去,你的快樂就不會再跑掉。」

西恩走遍大城小鎮,原野鄉村,
告訴每一個想要快樂的人,怎樣追尋快樂。
於是,西恩變成最快樂的人。