《野天鵝》

關閉
  • 譯者徐登志
  • 配音羅乙心、羅宏昇

華語導讀

王子們被詛咒,變成天鵝。備受王子們寵愛的小公主,要怎麼救回哥哥,她又會碰到什麼危險和誤解呢?

客語故事內容

頭擺有一個國王,佢有十一個倈同一個妹。
國王同王后真惜這兜細人,
逐個細人上學个時節,胸脯前做下結金星徽章,
腰箍繫(gie+)緊寶劍,擎鑽石做个筆在黃金枋面寫字。

到尾王后過身撇,國王討過一個新王后。
新王后心腸壞,佢將小公主送走,又同恁多個王子變做天鵝。
十一隻野天鵝,噭出傷心个聲,對王宮窗門飛出去,
直直飛到海脣个一大片樹林(naˇ)。

等到小公主十五歲,王后正喊人將佢帶轉王宮。
王后看著公主生來恁靚,真毋甘願,
佢帶三隻蟾蜍去浴堂,
新王后對第一隻蟾蜍講:
「小公主來洗身个時節,你愛坐在厥个頭那頂,將佢變做同你共樣戇!」
對第二隻蟾蜍講:
「你愛坐在厥个額頭,將佢變做當醜!」
對第三隻蟾蜍講:
「你愛懶在厥个胸脯,分佢心肝起歪心,嘴肚講出个做下係壞(fai^)話!」
在小公主堵正浸落洗身窟,三隻蟾蜍跈緊跳到厥圓身,
結果小公主本本好好,顛倒係該三隻蟾蜍變做鴉片花。

續緊王后又愐出一個歪心个計謀。
佢挑挑搞亂小公主个頭那毛,
又在厥个面糊一層臭風个油膏,
分佢像變做另外一個人。
國王認毋出小公主斯,講:
「這個醜細妹係麼人?遽遽喊佢走開!」

小公主已傷心斯離開王宮,佢當想念十一個阿哥,
斯決心愛去尋厥等。
佢行當久,來到一片樹林(shuˋ naˇ),
森林肚恬靜恬靜,草葉項有當多火黏蟲,
小公主在軟軟个溜苔面懶落來,無幾久斯睡撇咧

第二日,小公主醒來行去湖脣,佢跍落來,
用手捧一屑水,在面項挲啊挲,
佢原本又靚又白个皮膚斯現出來。
小公主跈湖邊緊行,
毋過佢毋知阿哥厥等在哪位,賭造化直直向頭前行去。
嘴燥咧,佢斯食路脣个泉水;
肚屎枵咧,斯食兜野生个漿果。

連連行有幾下日,小公主堵着一個擐核一籃漿果个老阿婆。
小公主問:「阿婆阿婆,請問你有看着十一個王子無?」
老阿婆講:
「𠊎無堵着麼个王子,毋過有看着十一隻天鵝,厥等在邊脣河壩泅水。」

公主順緊河壩行,佢行到海脣。
快斷烏咧,佢看着遠遠个所在,有十一隻天鵝對緊佢飛過來。
日頭落山了後,該兜天鵝斯變做派頭个王子,
小公主同該兜阿哥相認,大家當熱情揇共下。

大哥同老妹講:
「吾等日時頭係天鵝,日頭落山了後正會變轉人形。
吾等戴在當遠个國家,對這位愛飛兩日正得到,
天光日你肯同吾等共下去無?」
小公主頷啊頷頭那講:「好。」

該兜王子編一個大網,分小公主睡在網肚。
天一光,十一個王子變做天鵝,
大家用嘴螷(be+)咬緊大網,飛上天頂。
在半路,盡細个阿哥替小公主準備食个東西,替佢遮日頭。
十一隻天鵝飛歸日,停在海中个一粒海石頭面,
這當時海面吹起狂風,天頂緊𥍉爧,
大雨涿溼厥等个圓身,厥等手牽手,尖尖共下。

第二日天光,阿哥又變做天鵝,
咬緊小公主坐个大網,向大海个頭前起飛。
日頭落山个時節,厥等來到一個靚靚个國家,
十一隻天鵝將大網放在一個大山窿个窿口,
盡細漢个阿哥帶小公主行入窿肚,
同佢講:「這斯係若个間房,希望你發(bud^)一個好夢。」

暗晡頭小公主發夢看着一個仙女,
佢問仙女,仰脣正有法渡解除阿哥个巫術?
仙女講:
「你去摘蕁麻个莖,用腳蹴幼幼,抽出麻絲來,
織(ciag^)十一領長袖个襖,著在這兜阿哥个圓身,斯使得解除王后个巫術。
毋過蕁麻个毛竻有毒,你會疾去當毋著哦!
定著愛生在教堂墓地肚个蕁麻,正有用。
還過,你在編織(bien+ zhid^)該兜襖个時間肚,使毋得開嘴講話,
準講你開口講話,若个阿哥斯會做下死淨淨。」

小公主睡醒,記得仙女教佢个方法。
佢去教堂个墓地,摘當多蕁麻轉來,
佢忍緊雙手雙腳个痛疾,緊織長袖襖。

日頭落山了後,十一個阿哥轉來咧。
厥等看着小公主頭沉沉緊織衫,
手腳做下係傷,著驚一下!
厥等問小公主到底發生麼个事情,毋過小公主毋應,也無回答。

有一日朝晨,小公主當在該織衫,
堵好有一陣打獵个人來到山窿口,其中有一個人問小公主:
「𠊎係這個國家个國王,你係麼人?仰脣會戴在窿肚?」
小公主毋敢開嘴講話,國王恅着小公主係啞狗,
毋過看着佢恁靚,忍毋核嗄來愛着佢,
斯將佢帶轉王宮,按算愛討佢做新娘。

國王講:「𠊎將你織緊个衫做下搬過來咧。」
小公主使毋得開嘴講話,斯用感恩个目神緊看國王,
又過牽國王个手,唚一下。
婚禮過後,全國都當歡喜,
孤孤大主教疑狐認為小公主係巫婆,偷偷監視佢。
小公主長在等國王睡落覺了後,落眠床去另外一間細間房織衫。

有一日暗夜,蕁麻用撇咧。
為著過摘一屑蕁麻,佢無去教堂个墓地使毋得,
外背暗摸胥疏,佢摸去該生蕁麻个位所,動手拗蕁麻。
過扐轉王宮,無想着,大主教一路都跈緊佢。
大主教看着佢,半夜一個人行入教堂个墓地,還較相信佢係一個巫婆。

大主教將佢看着个同國王報告,國王个心肝越來越毋歡喜。
小公主當想將實際情形同國王講,
毋過為着阿哥厥等个細命,佢高不將忍核無講。
小公主拚命替阿哥厥等織襖,
當艱難織好十領,恁堵好蕁麻又用撇咧!
佢無顧心肝青驚,決心過去教堂个墓地拗蕁麻。

這擺,國王同大主教跈在厥尸背後,
看着佢行入墓地,國王个心肝碎撇咧!
佢相信大主教講个話做下係正經个。
法官認定小公主係巫婆,愛將佢燒死,
先同佢關入囹肚。

臨暗時節小公主在囹肚,聽着翼胛緊撥(badˋ)个聲,
該係盡細漢个阿哥變个天鵝,緊在該用翼胛撥鐵窗。
毋過小公主使毋得開嘴講話,單淨使得同細阿哥緊頷頭那,
手緊織盡尾該一領襖。

愛燒死巫婆个消息,已遽傳透全國。
小公主坐在一台壞陋个馬車項,雙手還在無閒緊編織襖,
有人罵佢係巫婆,愛來搶走厥身邊同厥手中个襖。
好恬恬天頂飛落來十一隻天鵝,閕開大大个翼胛,保護小公主。

小公主驚織好个蕁麻襖分人搶走,
扡起所有个襖對準準十一個阿哥擲(debˋ)過去!
該十一隻天鵝跈緊變做十一個派頭个王子,
單淨盡細个阿哥,還留著一邊天鵝个翼胛,
因致厥个襖,還有一隻衫袖無織好。

這當時小公主正開嘴講:「𠊎毋係巫婆。」
國王聽著事情个頭來尾去,正瞭解自家个王后,
毋單淨毋係啞狗,毋係巫婆,
還係盡慈心,盡堅強个王后。
恁泥了後厥等斯一生人過幸福快樂个生活。






【華語原文】

從前有一個國王,他有十一個男孩和一個女孩。
國王和王后非常疼愛這些孩子,
每個王子上學的時候,胸前都戴著金星徽章,
腰上掛著寶劍,用鑽石做的筆在黃金板上寫字。

可惜後來王后死了,國王又娶了一個新王后。
新王后壞心腸,她把小公主送走,還把王子們變成天鵝。
十一隻野天鵝,發出傷心的叫聲,從王宮窗戶飛出去,
一直飛到海邊的一座大森林。

直到小公主十五歲,王后才叫人把她帶回王宮。
王后看見公主長得美麗,十分忌妒,
她帶了三隻癩蝦蟆到浴室,
新王后對第一隻癩蝦蟆說:
「小公主來洗澡的時候,你要坐在她的頭上,讓她變得跟你一樣笨。」
對第二隻癩蝦蟆說:
「你要坐在她的額頭,,讓她變得很醜。」
對第三隻癩蝦蟆說,:
「你要躺在她的胸口,讓她心裡有壞念頭,嘴裡說出的都是壞話。」
當小公主走進浴缸,三隻癩蝦蟆立刻跳到她的身上,
結果小公主好好的,反倒是那三隻癩蝦蟆變成了罌粟花。

接著王后又想出了一個壞主意。
她故意弄亂小公主的頭髮,
又在她的臉上塗了一層發臭的油膏,
使她好像變了一個人。
國王認不出小公主,說,:
「這個醜姑娘是誰?趕快叫她走開!」

小公主傷心的離開王宮,她很想念十一個哥哥,
於是下定決心要去找他們。
她走了好久,來到一片森林,
森林裡非常安靜,草葉上有許多的螢火蟲,
小公主在柔軟的青苔上躺下來,不久就睡著了。

第二天,小公主醒來走到湖邊,她彎下彎,
用手捧起一些水,在臉上搓一搓,
原本美麗潔白的皮膚便顯露出來。
小公主從湖邊出發,
但是她不知道哥哥們在哪裡,只好一直向前走。
口渴了,她就喝路邊的泉水,
肚子餓了,就吃一些野生的漿果。

一連走了好幾天,小公主遇見一位提著一籃漿果的老太婆。
小公主問:「老婆婆,請問你有沒有看到十一個王子?」
老太婆說:「我沒遇見什麼王子,倒是看到十一隻天鵝,在附近河裡游水。」

公主沿著河走,來到海邊。
天快黑了,她看見遙遠的地方,有十一隻天鵝朝她飛過來。
當太陽沉到海裡,那些天鵝變成英俊的王子,
小公主和哥哥們相認,大家熱烈的互相擁抱。

大哥哥告訴妹妹:「我們白天是天鵝,太陽下山以後才會變回人。
我們住在很遠的王國,從這裡要飛兩天才到,
明天你願意跟我們一起走嗎?」
小公主點點頭說:「好。」

王子們編織了一個大網,讓小公主躺在網裡睡覺。
天一亮,十一個王子變成天鵝,
大家用嘴叼住大網,飛向天空。
在旅途中,最小的哥哥幫小公主準備食物,替她擋住陽光。
十一隻天鵝飛行了一整天,停在海中的一塊礁石上,
這時海上颳起狂風,天空出現了閃電,
大雨淋濕了他們的身體,他們手拉著手,擠在一起。

第二天天亮,哥哥們又變成天鵝,
叼起小公主乘坐的大網,從海中的礁石起飛。
太陽下山的時候,他們來到一個美麗的國度,
十一隻天鵝把大網放在一個大山洞的洞口,
最小的哥哥帶著小公主走進山洞,
對她說:「這就是你的房間,希望你做個好夢。」

晚上小公主夢見一位仙女,
她問仙女,怎麼樣才能幫哥哥們解除魔咒?
仙女說:
「你去摘下蕁麻的莖用腳踩碎,再抽出麻絲,
編織十一件長袖外套,披在哥哥們的身上,就可以解除王后的魔法。
不過蕁麻的毛刺有毒,會讓你痛得無法忍受!
而且只有長在教堂墳地裡的蕁麻,才有用。
同時,在你編織外套的日子裡,不可以開口說話,
如果你開口說話,你的哥哥就會死。」

小公主醒來,記得仙女教她的方法。
她到教堂的墳地,去摘回許多的蕁麻,
她不顧雙手雙腳的疼痛,編織長袖子的外套。

太陽下山以後,十一個哥哥回來了。
他們看到小公主低頭編織著衣服,
手腳都是傷,都吃了一驚!
他們問小公主到底發生什麼事,可是小公主不回答。

有一天早上,小公主正在編織衣服,
忽然一群打獵的人來到山洞前,其中有一個人問小公主:
「我是這個國家的國王,你是誰?,怎麼會住在山洞裡?」
小公主不敢開口說話,國王以為小公主是個啞巴,
但是看見她那麼美麗,忍不住喜歡上她,
就把她帶回王宮,準備娶她做新娘。

國王說:「我幫你把正在編織的衣服都搬過來了。」
小公主不能開口說話,只好用感激的眼神看著國王,
並且拉起國王的手,親了一下。
婚禮過後,全國都很開心,
只有大主教懷疑小公主是巫婆,悄悄的監視著她。
小公主常趁國王睡熟以後,爬下床到另一個小房間去編織衣服。

一天晚上,蕁麻用完了。
為了再摘一些蕁麻,她不能不去教堂的墳地,
她在黑暗中找到那片長滿蕁麻的土地,動手去摘蕁麻,再抱回皇宮。
沒想到,大主教一路都跟著她。
當大主教看見她,深夜一個人走進教堂的墳地,更相信她是一個巫婆。

大主教把他所看到的報告國王,國王越來越不開心。
小公主很想告訴國王真相,
可是為了哥哥們的性命,她只有忍住不說。
小公主拼命的為哥哥們編織外套,
好不容易編完十件,偏偏這時蕁麻又用光了!
她顧不得害怕,決定再到教堂的墳地去摘蕁麻。

這一次,國王和大主教跟在她的背後,
看見她溜進墳地,國王的心碎了!
他相信大主教說的話都是真的。
法官們認定小公主是巫婆,要把她燒死,
他們把她關進牢裡。

黃昏時小公主在牢房,聽到翅膀搧動的聲音,
那是最小的哥哥變成的天鵝,正用翅膀拍打著鐵窗。
但是小公主不能開口說話,只能向最小的哥哥點點頭,
一邊不停的編織著最後一件外套。

要燒死巫婆的消息,很快的傳遍了全國。
小公主坐在一輛破馬車上,雙手不停的忙著編織 
有人罵她是巫婆,要搶走她身邊和手中的衣服。
忽然天空飛下來十一隻天鵝,展開大大的翅膀,保護小公主。

小公主怕織好的蕁麻衣服被人們搶走,
抓起所有的衣服向十一個哥哥扔過去!
那十一隻天鵝立刻變成十一個英俊的王子,
只有最小的哥哥,還留下一隻天鵝的翅膀,
因為他的外套,還有一隻袖子沒有織好。

這時小公主才開口說:「我不是女巫。」
國王知道了事情的經過,才知道自己的王后,
不但不是啞巴,不是巫婆,
而是最仁慈,最堅強的王后。
從此他們過著幸福快樂的生活。