《野天鵝》

關閉
  • 譯者詹淑女
  • 配音周文靜、周碩興

華語導讀

王子們被詛咒,變成天鵝。備受王子們寵愛的小公主,要怎麼救回哥哥,她又會碰到什麼危險和誤解呢?

客語故事內容

頭擺有一個國王,佢有十一個倈仔摎一個妹仔。
國王摎王后盡惜這兜細人仔,
逐個王子讀書个時節,脯前全部戴等金星徽章,
在腰項掛等寶劍,佢兜用鑽石做个筆在黃金枋仔頂寫字。

無采啊背尾王后過身咧,國王又討咧一個新个王后。
新王后壞心腸,佢摎細公主送走,還摎王子佢兜變做天鵝。
十一隻野天鵝,發出咧傷心个喊聲,對王宮个窗門飛出去哩,
直直飛到海脣个一座大樹林。

等到細公主十五歲,王后正喊人摎佢帶轉王宮去。
王后䀴着公主生到恁靚,十分个目赤,
佢帶等三隻蟾蜍來到浴堂,
新王后對第一隻蟾蜍講:
「細公主來洗浴个時節,你愛坐在佢个頭那頂,分佢變到摎你共樣戇!」
又對第二隻蟾蜍講:
「你愛坐在佢个額頭,分佢變到當媸!」
背尾對第三隻蟾蜍講:
「你愛睡在佢个胸脯,分佢心肝肚有壞主意,嘴項講出个都係壞話!」
在細公主行落浴堂,三隻蟾蜍黏時跳到佢个膴身項,
結果啊細公主歸身好好,顛倒係該三隻蟾蜍嗄變做罌粟花咧。

續等王后又想出一隻壞主意。
佢挑挑裝亂細公主个頭那毛,
又在佢个面項膏一層臭風个油膏,
分佢像變做另外一個人。
國王認毋出細公主,講:
「這個恁媸个阿妹係麼人呢?煞兜仔喊佢行開!」

細公主傷心離開王宮,佢當想佢个十一個阿哥,
就決定愛去尋佢兜。
佢行當久,來到一片樹林,
樹林肚十分个恬靜,草葉項有當多火焰蟲,
細公主睡在軟軟个溜苔頂,無幾久就睡忒哩。

第二日,細公主睡醒來到湖脣頭,佢跍下來,
用手捧起一息仔水,在面項抹啊抹仔,
皮膚隨時變到像原旦个又靚又白咧
細公主對湖脣出發,
毋過佢毋知厥哥佢兜在哪位,只好緊向頭前行去。
嘴燥咧,佢就食路脣个泉水;
肚枵咧,就食一息仔野生个漿果。

連等行咧幾下日,細公主堵着一個擐等一籃漿果个老阿婆。
細公主問:「老阿婆,請問你有䀴着十一個王子無?」
老阿婆講:
「𠊎無堵着麼个王子,毋過有䀴着十一隻天鵝,就在附近溪壩肚泅水。」

公主順等溪壩行,來到海脣。
會斷烏哩,佢䀴着遠遠个所在,有十一隻天鵝向佢飛啊過來。
日頭落山過後,該兜天鵝斯變做緣投个王子,
細公主摎厥哥佢兜相認,大家當熱情个揇着共下。

大哥摎老妹講:
「𠊎兜日時頭係天鵝,日頭落山了後正會變轉人類哦…
𠊎兜戴在當遠个王國,對這位愛飛兩日正會到呢,
天光日你肯摎𠊎兜共下行無?」
細公主頭那頷啊頷仔講:「好。」

王子佢兜編咧一隻大網,分細公主在網肚睡。
天一光,十一個王子變做天鵝,
大家用嘴咬等大網,飛到天頂去
在旅途中,細哥摎細公主準備食个,替佢抵等日頭。
十一隻天鵝飛咧歸日,停在海中个一粒大石頭頂高,
這央時海面項起咧大狂風,天頂出現𥍉爧咧,
大水浴溼佢兜个膴身,佢兜手牽等手,尖尖到共下。

第二日天一光,阿哥佢兜又變做天鵝咧,
咬等細公主坐个大網,對海中个礁石飛起來哩喲。
日頭落山个時節,佢兜來到一隻靚靚个王國,
十一隻天鵝摎大網放在一隻大山窿个窿口,
盡細个阿哥渡等細公主行落窿肚去,
對佢講:「這就係你个間房,希望你有一隻好夢哦。」

暗晡頭細公主發夢䀴着一個仙女,
佢問仙女講,仰般正做得摎阿哥佢兜解忒魔法咒誓?
仙女講:
「你去摘蕁麻个梗用腳踏綿,再過抽出麻絲,
做十一領長襖,著在阿哥佢兜个膴身項,就做得解忒王后个魔法。
毋過蕁麻个毛竻有毒,會分你疾到佇毋著哦!
同時愛尋生在教堂墓地肚个蕁麻,正有效哦。
還過,在你編該兜襖仔个日仔,做毋得開嘴講話,
係講你開嘴講話,你个阿哥就會死淨淨哦。」

細公主醒過來,還記得仙女教佢个方法。
佢到教堂个墓地,去摘當多蕁麻轉來,
佢毋管雙手雙腳仰般疾,都緊編等長袖个襖。

日頭落山了後,十一個阿哥轉來哩。
佢兜䀴着細公主頭那犁犁緊編等衫,
手腳全係傷,都大著驚!
佢兜問細公主到底發生麼个事情,毋過細公主全毋應佢兜。

有一日晨早,細公主當在編等衫該下,
好恬恬仔一群打獵个人來到窿前,其中有一個人問細公主:
「𠊎係這隻國家个國王,你係麼人?仰般會戴在窿肚呢?」
細公主毋敢開嘴講話,國王話着細公主係啞狗,
毋過䀴着佢恁靚,忍毋核嗄來合意着佢,
就摎佢渡轉王宮,準備愛來討佢做新娘哩

國王講:「𠊎摎你𢯭手摎該兜正在該編等个衫做下搬過來哩。」
細公主做毋得開嘴講話,就用感激个目神䀴等國王,
同時牽起國王个手,唚咧一下。
婚禮過後,全國都當歡喜,
單淨大主教疑狐認為細公主係巫婆,偷偷來監視佢。
細公主長透等國王睡入覺了後,下眠床去到另外一隻細間房去編衫。

有一日暗夜,蕁麻用忒咧。
為着過摘一息仔蕁麻,佢只好去到教堂个墓地,
外背暗摸摸,佢尋着該片生淰淰蕁麻个位所,出手去摘蕁麻,再過扐轉王宮。
無想着,大主教一路都跈等佢呢。
大主教䀴着佢,半夜一個人行落教堂个墓地,還較相信佢斯係一個巫婆。

大主教摎佢䀴着个情形向國王報告,國王緊來緊毋歡喜咧。
細公主當想摎實際个情形摎國王講,
毋過為着阿哥佢兜个命,佢只好忍等毋講。
細公主拚命為阿哥佢兜編襖,
當無簡單編好十領哩,恁堵好蕁麻又用忒咧!
佢無愁慮自家會驚無,決定再過去教堂个墓地摘蕁麻。

這擺,國王摎大主教跈着佢个後背,
䀴着佢行落墓地,國王个心碎忒哩!
佢相信大主教講个話全部係正經个哪。
法官認定細公主係巫婆,愛摎佢燒死呢,
佢兜摎細公主關落囹仔肚。

臨暗時細公主在囹仔肚,聽着翼緊撥个聲哦,
該係最細个阿哥變个天鵝,當當在該用翼撥等鐵窗。
毋過細公主做毋得開嘴講話,淨做得向細阿哥頭那點啊點仔,
緊編等最尾个一領襖 。

愛燒死巫婆个消息,當遽就傳透全國咧。
細公主坐在一輛爛馬車項,雙手還無閒緊編等襖,
有人罵佢係巫婆,愛來搶走佢身邊摎手項个衫。
忽然間天頂飛下來十一隻天鵝,展開大大个翼胛來,保護細公主哩喲。

細公主驚織好个蕁麻衫分人搶走,
扡起所有个衫向十一個阿哥擲啊過去!
該十一隻天鵝黏時變做十一個浱頭个王子,
單淨只有最細个阿哥,還留下一支天鵝个翼,
因為佢个襖,還有一隻衫袖無做好呢。

這央時細公主正開嘴講:「𠊎毋係巫婆。」
國王知着這兜事情个經過,正知自家个王后,
毋單淨毋係啞狗,毋係巫婆,
還係盡仁慈,最堅強个王后。
就恁樣佢兜過等幸福快樂个生活哩喲。






【華語原文】

從前有一個國王,他有十一個男孩和一個女孩。
國王和王后非常疼愛這些孩子,
每個王子上學的時候,胸前都戴著金星徽章,
腰上掛著寶劍,用鑽石做的筆在黃金板上寫字。

可惜後來王后死了,國王又娶了一個新王后。
新王后壞心腸,她把小公主送走,還把王子們變成天鵝。
十一隻野天鵝,發出傷心的叫聲,從王宮窗戶飛出去,
一直飛到海邊的一座大森林。

直到小公主十五歲,王后才叫人把她帶回王宮。
王后看見公主長得美麗,十分忌妒,
她帶了三隻癩蝦蟆到浴室,
新王后對第一隻癩蝦蟆說:
「小公主來洗澡的時候,你要坐在她的頭上,讓她變得跟你一樣笨。」
對第二隻癩蝦蟆說:
「你要坐在她的額頭,,讓她變得很醜。」
對第三隻癩蝦蟆說,:
「你要躺在她的胸口,讓她心裡有壞念頭,嘴裡說出的都是壞話。」
當小公主走進浴缸,三隻癩蝦蟆立刻跳到她的身上,
結果小公主好好的,反倒是那三隻癩蝦蟆變成了罌粟花。

接著王后又想出了一個壞主意。
她故意弄亂小公主的頭髮,
又在她的臉上塗了一層發臭的油膏,
使她好像變了一個人。
國王認不出小公主,說,:
「這個醜姑娘是誰?趕快叫她走開!」

小公主傷心的離開王宮,她很想念十一個哥哥,
於是下定決心要去找他們。
她走了好久,來到一片森林,
森林裡非常安靜,草葉上有許多的螢火蟲,
小公主在柔軟的青苔上躺下來,不久就睡著了。

第二天,小公主醒來走到湖邊,她彎下彎,
用手捧起一些水,在臉上搓一搓,
原本美麗潔白的皮膚便顯露出來。
小公主從湖邊出發,
但是她不知道哥哥們在哪裡,只好一直向前走。
口渴了,她就喝路邊的泉水,
肚子餓了,就吃一些野生的漿果。

一連走了好幾天,小公主遇見一位提著一籃漿果的老太婆。
小公主問:「老婆婆,請問你有沒有看到十一個王子?」
老太婆說:「我沒遇見什麼王子,倒是看到十一隻天鵝,在附近河裡游水。」

公主沿著河走,來到海邊。
天快黑了,她看見遙遠的地方,有十一隻天鵝朝她飛過來。
當太陽沉到海裡,那些天鵝變成英俊的王子,
小公主和哥哥們相認,大家熱烈的互相擁抱。

大哥哥告訴妹妹:「我們白天是天鵝,太陽下山以後才會變回人。
我們住在很遠的王國,從這裡要飛兩天才到,
明天你願意跟我們一起走嗎?」
小公主點點頭說:「好。」

王子們編織了一個大網,讓小公主躺在網裡睡覺。
天一亮,十一個王子變成天鵝,
大家用嘴叼住大網,飛向天空。
在旅途中,最小的哥哥幫小公主準備食物,替她擋住陽光。
十一隻天鵝飛行了一整天,停在海中的一塊礁石上,
這時海上颳起狂風,天空出現了閃電,
大雨淋濕了他們的身體,他們手拉著手,擠在一起。

第二天天亮,哥哥們又變成天鵝,
叼起小公主乘坐的大網,從海中的礁石起飛。
太陽下山的時候,他們來到一個美麗的國度,
十一隻天鵝把大網放在一個大山洞的洞口,
最小的哥哥帶著小公主走進山洞,
對她說:「這就是你的房間,希望你做個好夢。」

晚上小公主夢見一位仙女,
她問仙女,怎麼樣才能幫哥哥們解除魔咒?
仙女說:
「你去摘下蕁麻的莖用腳踩碎,再抽出麻絲,
編織十一件長袖外套,披在哥哥們的身上,就可以解除王后的魔法。
不過蕁麻的毛刺有毒,會讓你痛得無法忍受!
而且只有長在教堂墳地裡的蕁麻,才有用。
同時,在你編織外套的日子裡,不可以開口說話,
如果你開口說話,你的哥哥就會死。」

小公主醒來,記得仙女教她的方法。
她到教堂的墳地,去摘回許多的蕁麻,
她不顧雙手雙腳的疼痛,編織長袖子的外套。

太陽下山以後,十一個哥哥回來了。
他們看到小公主低頭編織著衣服,
手腳都是傷,都吃了一驚!
他們問小公主到底發生什麼事,可是小公主不回答。

有一天早上,小公主正在編織衣服,
忽然一群打獵的人來到山洞前,其中有一個人問小公主:
「我是這個國家的國王,你是誰?,怎麼會住在山洞裡?」
小公主不敢開口說話,國王以為小公主是個啞巴,
但是看見她那麼美麗,忍不住喜歡上她,
就把她帶回王宮,準備娶她做新娘。

國王說:「我幫你把正在編織的衣服都搬過來了。」
小公主不能開口說話,只好用感激的眼神看著國王,
並且拉起國王的手,親了一下。
婚禮過後,全國都很開心,
只有大主教懷疑小公主是巫婆,悄悄的監視著她。
小公主常趁國王睡熟以後,爬下床到另一個小房間去編織衣服。

一天晚上,蕁麻用完了。
為了再摘一些蕁麻,她不能不去教堂的墳地,
她在黑暗中找到那片長滿蕁麻的土地,動手去摘蕁麻,再抱回皇宮。
沒想到,大主教一路都跟著她。
當大主教看見她,深夜一個人走進教堂的墳地,更相信她是一個巫婆。

大主教把他所看到的報告國王,國王越來越不開心。
小公主很想告訴國王真相,
可是為了哥哥們的性命,她只有忍住不說。
小公主拼命的為哥哥們編織外套,
好不容易編完十件,偏偏這時蕁麻又用光了!
她顧不得害怕,決定再到教堂的墳地去摘蕁麻。

這一次,國王和大主教跟在她的背後,
看見她溜進墳地,國王的心碎了!
他相信大主教說的話都是真的。
法官們認定小公主是巫婆,要把她燒死,
他們把她關進牢裡。

黃昏時小公主在牢房,聽到翅膀搧動的聲音,
那是最小的哥哥變成的天鵝,正用翅膀拍打著鐵窗。
但是小公主不能開口說話,只能向最小的哥哥點點頭,
一邊不停的編織著最後一件外套。

要燒死巫婆的消息,很快的傳遍了全國。
小公主坐在一輛破馬車上,雙手不停的忙著編織 
有人罵她是巫婆,要搶走她身邊和手中的衣服。
忽然天空飛下來十一隻天鵝,展開大大的翅膀,保護小公主。

小公主怕織好的蕁麻衣服被人們搶走,
抓起所有的衣服向十一個哥哥扔過去!
那十一隻天鵝立刻變成十一個英俊的王子,
只有最小的哥哥,還留下一隻天鵝的翅膀,
因為他的外套,還有一隻袖子沒有織好。

這時小公主才開口說:「我不是女巫。」
國王知道了事情的經過,才知道自己的王后,
不但不是啞巴,不是巫婆,
而是最仁慈,最堅強的王后。
從此他們過著幸福快樂的生活。