《野天鵝》

關閉
  • 譯者烏衣行
  • 配音李幸妃、廖烈震

華語導讀

王子們被詛咒,變成天鵝。備受王子們寵愛的小公主,要怎麼救回哥哥,她又會碰到什麼危險和誤解呢?

客語故事內容

古早有一個國王,佢有十一個後生和一個阿女。
國王和王后嶄然惜這兜細子,
逐個王子去學校个時務,胸前歸下結金星徽章,
腰上掛寶劍,用鑽石做个筆在黃金枋面上寫字。

無採,落來王后過身啊,國王又渡一個新王后。
新王后真歹心,佢拁小公主送走,猶拁遐兜王子變做天鵝。
十一隻野天鵝,發出艱難个喊聲,對王宮窗子門飛出去,
直直飛到海脣个一座大樹林。

一直到小公主十五歲,王后正喊人拁佢渡轉王宮。
王后䀴着公主生到靚靚,全然目珠紅,
佢隨三隻蚯蚯婆到洗浴間,
新王后對第一隻蚯蚯婆講:
「小公主來洗浴个時務,你愛坐在佢个頭那崠,得佢變到和你共款戇!」
對第二隻蚯蚯婆講:
「你愛坐在佢个額頭,得佢變到真䆀樣!」
對第三隻蚯蚯婆講:
「你愛橫倒在佢个胸脯,得佢心內有歹齣頭,嘴底講出來个攏係歹事!」
在小公主行入洗浴間,三隻蚯蚯婆隨跳到佢个膴身,
結果小公主好好無仰子,顛倒係遐三隻蚯蚯婆變做罌粟花。

接落王后又想出一個歹齣頭。
佢挑持舞亂小公主个頭那毛,
又在佢个面面上膏一緣臭風个油膏,
得佢若像變做猶一個人。
國王認毋會出小公主,講:
「這個妹子鬼係麼儕?較緊喊佢行走!」

小公主真艱難離開王宮,佢真思念十一個阿哥,
所以下定決心討去尋佢人。
佢行到真久,來到一片樹林,
樹林內底滿足恬靜,草葉面上有真多火焰蟲,
小公主在軟柔个青苔面上倒落來,無幾久即睡去啊。

翻轉日,小公主醒過來行到湖脣,佢跍落腰身,
用手抔一兜仔水,在面面上抹啊抹,
本底靚靚白白个皮膚即現出來。
小公主對湖脣出發,
毋過佢毋知阿哥佢人在哪位,只好直頭向前行。
嘴燥啊,佢即啉路脣个泉水;
屎肚枵啊,即食一兜仔野生个漿果。

連續行幾下日,小公主堵着一個擐一籃漿果个老阿婆。
小公主問:「老阿婆,請問你敢有䀴着十一個王子?」
老阿婆講:
「𠊎無堵着麼个王子,顛倒係䀴着十一隻天鵝,在就近溪底泅水。」

公主順溪水行,來到海脣。
天討暗啊,佢䀴着遠遠个所在,有十一隻天鵝對佢飛過來。
在日頭沉落海个時,遐兜天鵝變做緣投个王子,
小公主和阿哥佢人相認,大家真熱情攬作垺。

大哥拁阿妹講:
「𠊎人日時頭係天鵝,日頭落山了後正會變轉人。
𠊎人蹛在真遠个王國,對這飛愛兩日正會到位,
韶日你肯和𠊎人作垺行無?」
小公主頭那頕啊頕講:「好。」

王子佢人編一個大網,得小公主倒在網內底睡。
天一光,十一個王子變做天鵝,
大家用嘴銜大網,飛向天崠。
在路途,頭細个阿哥拁小公主準備食个,拁佢擋日頭。
十一隻天鵝飛歸日,歇在海中央个一垤礁石面上,
這個時海面上起狂風,天崠出現𥍉爧,
大水涿濕佢人个身體,佢人手牽手,尖作垺。

第二日天光,阿哥佢人又變做天鵝,
銜小公主坐个大網,對海中央个礁石飛起來。
日頭落山个時務,佢人來到一個靚靚个王國,
十一隻天鵝和大網囥在一個大磅空个空口,
頭細个阿哥渡小公主行入磅空,
對佢講:「這即係你个間房,希望你做一個好夢。」

夜時頭小公主發夢着一個仙女,
佢問仙女,仰子正會用拁阿哥佢人解開符咒?
仙女講:
「你去捋蕁麻个梗,用腳蹬綿綿,擱抽出麻絲,
編十一領長襖,幔在阿哥佢人个膴身,即會用解開王后个符咒。
毋過蕁麻个毛竻有毒,會得你疾到佇毋會核!
同時愛生在教堂埔地內底个蕁麻,正有效。
猶擱,在你編大襖个日子內底,毋會用開嘴講事,
若你開嘴講事,你个阿哥即會死去。」

小公主醒過來,記得仙女教佢个方法。
佢去教堂个埔地,去捋真多蕁麻轉來,
佢毋管雙手雙腳个疾,一直在編長衫袖个大襖。

日頭落山了後,十一個阿哥轉來啊。
佢人䀴着小公主頭犁犁直頭編衫,
手腳攏係傷,攏真着驚!
佢人問小公主鬥底發生麼个事情,毋過小公主毋應毋答。

有一日晨早,小公主當在編衫,
好定泥一陣打獵个人來到磅空頭前,其中有一個人問小公主:
「𠊎係這個國家个國王,你係麼儕?仰子會蹛在磅空內底?」
小公主毋敢開嘴講事,國王想講小公主係一個啞狗,
毋過䀴着佢恁靚,嗄忍毋會核愛着佢,
即拁佢渡轉王宮,準備渡佢做新娘。

國王講:「𠊎鬥相共你拁當在編个衫攏搬搬過來啊。」
小公主毋會用開嘴講事,只好用感激个目神䀴國王,
同時牽起國王个手,唚一下。
婚禮過後,歸國攏真歡喜,
正有大主教嫌疑小公主係巫婆,偷偷監視佢。
小公主恬等國王睡落眠了後,跋落眠床去猶一個小房間編衫。

一日暗夜,蕁麻用淨啊。
為着擱捋一兜仔蕁麻,佢無法度無去教堂个埔地,
佢在烏暗內底尋着遐片蕁麻生淰淰个土地,出手去捋蕁麻,擱抔轉王宮。
無想着,大主教歸路攏跈在佢後背。
在大主教䀴着佢,半夜一個人行入教堂个埔地,猶較相信佢係一個巫婆。

大主教拁佢䀴着个向國王報告,國王越來越無歡喜。
小公主真想討拁國王講實情,
毋過為着阿哥佢人个命,佢不得已忍蹛毋講。
小公主拚命為阿哥佢人編大襖,
真無簡單編好十領,恁堵好,這時蕁麻又用淨啊!
佢毋管會驚無,決定擱去教堂个埔地去捋蕁麻。

這擺,國王和大主教跈在佢後背,
䀴着佢走入埔地,國王个心攏碎啊!
佢相信大主教講个事攏係正經个,
一陣法官認定小公主係巫婆,討拁佢燒死,
佢人拁佢關入枷牢內底。

烏昏時,小公主在枷牢,聽着翼直頭撥个聲,
遐係頭細个阿哥變个天鵝,當在用翼撥鐵窗。
毋過小公主毋會用開嘴講事,正會用著面向頭細个阿哥頭那點啊點,
著面直頭編頭尾一領大襖。

討燒死巫婆个消息,真緊歸國傳透透。
小公主坐在一輛爛馬車,雙手無歇直頭編,
有人罵佢係巫婆,討搶走佢身脣和手頭个衫。
好定泥天崠飛落來十一隻天鵝,展開大大个翼,保護小公主。

小公主驚織好个蕁麻衫得人搶走,
抔起歸下个衫向十一個阿哥抌過去!
遐十一隻天鵝隨變做十一個緣投个王子,
正有頭細个阿哥,猶留落一支天鵝个翼,
因為佢个大襖,猶有一個衫袖吂編好。

這個時小公主正開嘴講:「𠊎毋係巫婆。」
國王了解事情个經過,正知自家个王后,
毋若毋係啞狗,毋係巫婆,
嗄係頭仁慈,頭堅強个王后。
對遐時起佢人過着福氣快活个生活。






【華語原文】

從前有一個國王,他有十一個男孩和一個女孩。
國王和王后非常疼愛這些孩子,
每個王子上學的時候,胸前都戴著金星徽章,
腰上掛著寶劍,用鑽石做的筆在黃金板上寫字。

可惜後來王后死了,國王又娶了一個新王后。
新王后壞心腸,她把小公主送走,還把王子們變成天鵝。
十一隻野天鵝,發出傷心的叫聲,從王宮窗戶飛出去,
一直飛到海邊的一座大森林。

直到小公主十五歲,王后才叫人把她帶回王宮。
王后看見公主長得美麗,十分忌妒,
她帶了三隻癩蝦蟆到浴室,
新王后對第一隻癩蝦蟆說:
「小公主來洗澡的時候,你要坐在她的頭上,讓她變得跟你一樣笨。」
對第二隻癩蝦蟆說:
「你要坐在她的額頭,,讓她變得很醜。」
對第三隻癩蝦蟆說,:
「你要躺在她的胸口,讓她心裡有壞念頭,嘴裡說出的都是壞話。」
當小公主走進浴缸,三隻癩蝦蟆立刻跳到她的身上,
結果小公主好好的,反倒是那三隻癩蝦蟆變成了罌粟花。

接著王后又想出了一個壞主意。
她故意弄亂小公主的頭髮,
又在她的臉上塗了一層發臭的油膏,
使她好像變了一個人。
國王認不出小公主,說,:
「這個醜姑娘是誰?趕快叫她走開!」

小公主傷心的離開王宮,她很想念十一個哥哥,
於是下定決心要去找他們。
她走了好久,來到一片森林,
森林裡非常安靜,草葉上有許多的螢火蟲,
小公主在柔軟的青苔上躺下來,不久就睡著了。

第二天,小公主醒來走到湖邊,她彎下彎,
用手捧起一些水,在臉上搓一搓,
原本美麗潔白的皮膚便顯露出來。
小公主從湖邊出發,
但是她不知道哥哥們在哪裡,只好一直向前走。
口渴了,她就喝路邊的泉水,
肚子餓了,就吃一些野生的漿果。

一連走了好幾天,小公主遇見一位提著一籃漿果的老太婆。
小公主問:「老婆婆,請問你有沒有看到十一個王子?」
老太婆說:「我沒遇見什麼王子,倒是看到十一隻天鵝,在附近河裡游水。」

公主沿著河走,來到海邊。
天快黑了,她看見遙遠的地方,有十一隻天鵝朝她飛過來。
當太陽沉到海裡,那些天鵝變成英俊的王子,
小公主和哥哥們相認,大家熱烈的互相擁抱。

大哥哥告訴妹妹:「我們白天是天鵝,太陽下山以後才會變回人。
我們住在很遠的王國,從這裡要飛兩天才到,
明天你願意跟我們一起走嗎?」
小公主點點頭說:「好。」

王子們編織了一個大網,讓小公主躺在網裡睡覺。
天一亮,十一個王子變成天鵝,
大家用嘴叼住大網,飛向天空。
在旅途中,最小的哥哥幫小公主準備食物,替她擋住陽光。
十一隻天鵝飛行了一整天,停在海中的一塊礁石上,
這時海上颳起狂風,天空出現了閃電,
大雨淋濕了他們的身體,他們手拉著手,擠在一起。

第二天天亮,哥哥們又變成天鵝,
叼起小公主乘坐的大網,從海中的礁石起飛。
太陽下山的時候,他們來到一個美麗的國度,
十一隻天鵝把大網放在一個大山洞的洞口,
最小的哥哥帶著小公主走進山洞,
對她說:「這就是你的房間,希望你做個好夢。」

晚上小公主夢見一位仙女,
她問仙女,怎麼樣才能幫哥哥們解除魔咒?
仙女說:
「你去摘下蕁麻的莖用腳踩碎,再抽出麻絲,
編織十一件長袖外套,披在哥哥們的身上,就可以解除王后的魔法。
不過蕁麻的毛刺有毒,會讓你痛得無法忍受!
而且只有長在教堂墳地裡的蕁麻,才有用。
同時,在你編織外套的日子裡,不可以開口說話,
如果你開口說話,你的哥哥就會死。」

小公主醒來,記得仙女教她的方法。
她到教堂的墳地,去摘回許多的蕁麻,
她不顧雙手雙腳的疼痛,編織長袖子的外套。

太陽下山以後,十一個哥哥回來了。
他們看到小公主低頭編織著衣服,
手腳都是傷,都吃了一驚!
他們問小公主到底發生什麼事,可是小公主不回答。

有一天早上,小公主正在編織衣服,
忽然一群打獵的人來到山洞前,其中有一個人問小公主:
「我是這個國家的國王,你是誰?,怎麼會住在山洞裡?」
小公主不敢開口說話,國王以為小公主是個啞巴,
但是看見她那麼美麗,忍不住喜歡上她,
就把她帶回王宮,準備娶她做新娘。

國王說:「我幫你把正在編織的衣服都搬過來了。」
小公主不能開口說話,只好用感激的眼神看著國王,
並且拉起國王的手,親了一下。
婚禮過後,全國都很開心,
只有大主教懷疑小公主是巫婆,悄悄的監視著她。
小公主常趁國王睡熟以後,爬下床到另一個小房間去編織衣服。

一天晚上,蕁麻用完了。
為了再摘一些蕁麻,她不能不去教堂的墳地,
她在黑暗中找到那片長滿蕁麻的土地,動手去摘蕁麻,再抱回皇宮。
沒想到,大主教一路都跟著她。
當大主教看見她,深夜一個人走進教堂的墳地,更相信她是一個巫婆。

大主教把他所看到的報告國王,國王越來越不開心。
小公主很想告訴國王真相,
可是為了哥哥們的性命,她只有忍住不說。
小公主拼命的為哥哥們編織外套,
好不容易編完十件,偏偏這時蕁麻又用光了!
她顧不得害怕,決定再到教堂的墳地去摘蕁麻。

這一次,國王和大主教跟在她的背後,
看見她溜進墳地,國王的心碎了!
他相信大主教說的話都是真的。
法官們認定小公主是巫婆,要把她燒死,
他們把她關進牢裡。

黃昏時小公主在牢房,聽到翅膀搧動的聲音,
那是最小的哥哥變成的天鵝,正用翅膀拍打著鐵窗。
但是小公主不能開口說話,只能向最小的哥哥點點頭,
一邊不停的編織著最後一件外套。

要燒死巫婆的消息,很快的傳遍了全國。
小公主坐在一輛破馬車上,雙手不停的忙著編織 
有人罵她是巫婆,要搶走她身邊和手中的衣服。
忽然天空飛下來十一隻天鵝,展開大大的翅膀,保護小公主。

小公主怕織好的蕁麻衣服被人們搶走,
抓起所有的衣服向十一個哥哥扔過去!
那十一隻天鵝立刻變成十一個英俊的王子,
只有最小的哥哥,還留下一隻天鵝的翅膀,
因為他的外套,還有一隻袖子沒有織好。

這時小公主才開口說:「我不是女巫。」
國王知道了事情的經過,才知道自己的王后,
不但不是啞巴,不是巫婆,
而是最仁慈,最堅強的王后。
從此他們過著幸福快樂的生活。