《野天鵝》

關閉
  • 譯者陳志寧
  • 配音宋菁玲、謝國玄

華語導讀

王子們被詛咒,變成天鵝。備受王子們寵愛的小公主,要怎麼救回哥哥,她又會碰到什麼危險和誤解呢?

客語故事內容

頭擺有一個國王 佢有十一個倈仔同一個妹仔。
國王同王后盡惜這兜細人仔,
每個王子上學个時節,胸前聚概戴等金星徽章,
腰仔項挽等寶劍,用鑽石做个筆在黃金枋仔項寫字。

無採下後王后過身吔,國王又討過一個新王后。
新王后壞心壞事,佢同細公主送走,還同王子佢等變做天鵝。
十一隻野天鵝,叫等傷心个聲胲,對王宮个窗仔飛出去,
直直飛到海脣个一座大森林。

等到細公主十五歲,王后正喚人同佢帶歸皇宮。
王后看着公主生啊鬧,目珠盡紅,
佢帶吔三隻蟾蜍囉到浴堂,
新王后對第一隻蟾蜍囉(samˇ puˇ loˇ)講:
「細公主來洗身該下,你愛坐在佢个頭那頂,分佢變得同你共樣戇!」
對第二隻蟾蜍囉講:
「你愛坐在佢个額頭,分佢變得盡媸!」
對第三隻蟾蜍囉講:
「你愛眠啊在佢个胸脯,分佢心肝肚有壞心事,對嘴講出个聚概係壞話!」
就在細公主行入浴堂,三隻蟾蜍囉黏時跳啊佢个身項,
結果(giadˋ goˋ)細公主本本好好,顛倒係該三隻蟾蜍囉變做鴉片花。

續等仔王后又愐出一個壞心事。
佢剔試同細公主个頭那毛張亂,
又在佢个面上膏吔一層蓬臭(pungˇ cu)个油膏,
分佢蓋像變做另外一個人。
國王認毋出細公主,就講:
「這恁媸个細妹仔係麼人?共快逐佢行開!」

細公主傷心个離開皇宮,佢盡思念十一個阿哥,
就決心愛去尋佢等。
佢行吔盡久,來到一座森林,
森林裡背盡恬靜,草葉頂項有盡多个火焰蟲,
細公主在鬆軟个溜苔項眠下來,無幾久就睡核吔。

第二日,細公主睡醒行到湖脣,佢磬下身,
用手捧一息仔水,在面項挲挲啊,
本成盡鬧又瀉白个皮膚就現現出來。
細公主對湖脣出發,
毋過佢毋知阿哥佢等在哪仔,高不將就緊行前去。
嘴燥吔,佢就啉路脣个自然水;
肚飢吔,就食一息野生个水果。

續等仔行吔幾下日,細公主堵着一個擐等一籃水果个老阿婆。
細公主問:「老阿婆,請問你有看着十一個王子無?」
老阿婆講:
「𠊎無堵着麼个王子,毋過有看着十一隻天鵝,就在面前个河壩該仔泅水。」

公主順等河壩行,來到海脣。
會斷烏吔,佢看着對盡遠个所在,有十一隻天鵝飛向佢過來。
就在日頭沉啊海裡背,該兜天鵝就變做緣投个王子,
細公主同厥哥佢等相認,大家又飆又喊个揇共下。

大阿哥同老妹講:
「日時頭𠊎等係天鵝,日頭落山過後正會變轉人。
𠊎等歇在盡遠个王國,對這仔愛飛兩日正會到,
天光日你肯同𠊎等共下走無?
細公主頭那頷啊頷仔講:「肯。」

王子佢等刺(qiagˋ)吔一領大網,分細公主眠在網仔裡背睡目。
一天光,十一個王子變做天鵝,
大家用嘴啣等大網,向天頂飛去。
在路項,最細个阿哥同細公主準備吔食个東西,同佢扺等日頭。
十一隻天鵝飛吔歸日仔,恬在海在中一個石埔頂項,
這時節海面掀起狂風,天頂𥍉等爧,
大嫲雨涿濕佢等个圓身,佢等手牽等手,集(qib)共下。

第二日天光,阿哥佢等又變做天鵝,
啣等細公主坐个大網,對海項个石埔飛起來。
日頭落山个時節,佢等來到一個盡鬧个王國,
十一隻天鵝同大網囥啊在一個大山窿个面前,
最細个阿哥帶等細公主行入山窿,
同佢講:「這仔就係你个間房,分你暗晡睡得好。」

暗晡頭細公主發夢着一個仙女,
佢問仙女,愛仰仔正做得同厥哥佢等破解符誥?
仙女講:
「你去拗苧仔个莖用腳蹬綿,再過抽出麻仔絲,
刺十一領長袖外衫,拔啊阿哥佢等个身項,就做得破解王后个符誥。
毋過苧仔个毛竻有毒,你會痛到佇毋著!
又搭淨生啊在教堂牛埔地該仔个苧仔,正有效果。
又還有,你在刺外衫个該兜日仔,使毋得開聲講話,
準假你開聲講話,若哥佢等就會死核。」

細公主睡醒,記得仙女教佢个方法。
佢去教堂个牛埔該,拗歸盡多个苧仔,
佢無顧手同腳个痛,刺等長袖个外衫。

日頭落山過後,十一個阿哥歸來吔。
佢等看着細公主頭磬磬仔刺等衫,
手腳一哪仔全傷,聚概著驚一下!
佢等問細公主到底發生麼个事,毋過細公主無應話(moˇ in fa)。

有一日朝晨,細公主刺等衫,
突然間有一陣打獵个人來到山窿面前,其中有一個人問細公主:
「𠊎係這個國家个國王,你係麼人?仰會歇啊在山窿裡背?」
細公主毋敢開聲講話,國王覺著細公主係啞狗,
毋過看着佢生啊恁鬧,嗄來合意着佢,
就同佢帶歸去皇宮,準備愛來討佢做新娘。

國王講:「𠊎同你𢯭徙該兜你刺等个衫過來。」
細公主使毋得開聲講話,淨做得用感恩个眼神看等國王,
同時牽起國王个手,唚吔一下。
婚禮過後,全國都盡暢,
就淨大主教疑狐細公主係牽仙婆,偷偷仔監視等佢。
細公主不時等國王睡落覺過後,趖下眠床去另外一個細間房刺長衫。

有一日暗晡,苧仔用核吔。
為着拗加一息苧仔,佢高不而將去教堂个牛埔,
暗摸胥疏當中,佢尋着苧仔生啊一哪仔个所在,動手去拗苧仔,再扐歸去皇宮。無愐着,大主教跈佢行一路去。
就在大主教看着佢,恁夜吔一個人行入教堂个牛埔,又過相信佢係牽仙婆。

大主教同佢所看着个報告國王,國王个心情緊來緊毋好。
細公主盡想同國王講真相,
毋過為着阿哥佢等个性命,佢硬忍等毋講。
細公主拚命个同阿哥佢等刺外衫,
辛辛苦苦刺好十領,恁堵好這時節苧仔又用核吔!
佢哪會知驚,決定再去教堂个牛埔拗苧仔。

這擺,國王同大主教跈等佢屎背尾,
看着佢溜入牛埔,國王死心吔。
佢相信大主教个話聚概係真个。
法官佢等認定細公主係牽仙婆,愛同佢燒死,
佢等同佢跼起來。

臨暗該下細公主在監牢,聽着翼胛撥(bad)等个聲音,
該係最細个阿哥變个天鵝,用翼胛拍等鐵窗仔。
毋過細公主使毋得開聲講話,淨做得同最細个阿哥緊頷頭,
無停个刺等最尾一領外衫。

愛燒死牽仙婆个消息,盡遽就傳交吔全國。
細公主坐在一臺爛馬車頂項,兩隻手無閒个刺等,
有人罵佢係牽仙婆,想愛搶走佢身邊同手項个長衫。
突然間天頂飛下來十一隻天鵝,閕開大大个翼胛,保護細公主。

細公主驚刺好个苧仔長衫分人搶走,
抓起所有个長衫擳分十一個阿哥!
該十一隻天鵝黏時變轉十一個緣投个王子,
淨伸最細个阿哥 還留等一支天鵝个翼胛,
因為佢个長衫,有一隻衫袖仔還無刺好。

這時節細公主正開聲講:「𠊎毋係牽仙婆。」
國王知得事情个經過,正知自家个王后,
毋單只毋係啞狗,毋係牽仙婆,
顛倒係盡仁慈、最堅強(gienˊ kiongˇ)个王后。
從此,佢等過等美滿暢樂个生活。






【華語原文】

從前有一個國王,他有十一個男孩和一個女孩。
國王和王后非常疼愛這些孩子,
每個王子上學的時候,胸前都戴著金星徽章,
腰上掛著寶劍,用鑽石做的筆在黃金板上寫字。

可惜後來王后死了,國王又娶了一個新王后。
新王后壞心腸,她把小公主送走,還把王子們變成天鵝。
十一隻野天鵝,發出傷心的叫聲,從王宮窗戶飛出去,
一直飛到海邊的一座大森林。

直到小公主十五歲,王后才叫人把她帶回王宮。
王后看見公主長得美麗,十分忌妒,
她帶了三隻癩蝦蟆到浴室,
新王后對第一隻癩蝦蟆說:
「小公主來洗澡的時候,你要坐在她的頭上,讓她變得跟你一樣笨。」
對第二隻癩蝦蟆說:
「你要坐在她的額頭,,讓她變得很醜。」
對第三隻癩蝦蟆說,:
「你要躺在她的胸口,讓她心裡有壞念頭,嘴裡說出的都是壞話。」
當小公主走進浴缸,三隻癩蝦蟆立刻跳到她的身上,
結果小公主好好的,反倒是那三隻癩蝦蟆變成了罌粟花。

接著王后又想出了一個壞主意。
她故意弄亂小公主的頭髮,
又在她的臉上塗了一層發臭的油膏,
使她好像變了一個人。
國王認不出小公主,說,:
「這個醜姑娘是誰?趕快叫她走開!」

小公主傷心的離開王宮,她很想念十一個哥哥,
於是下定決心要去找他們。
她走了好久,來到一片森林,
森林裡非常安靜,草葉上有許多的螢火蟲,
小公主在柔軟的青苔上躺下來,不久就睡著了。

第二天,小公主醒來走到湖邊,她彎下彎,
用手捧起一些水,在臉上搓一搓,
原本美麗潔白的皮膚便顯露出來。
小公主從湖邊出發,
但是她不知道哥哥們在哪裡,只好一直向前走。
口渴了,她就喝路邊的泉水,
肚子餓了,就吃一些野生的漿果。

一連走了好幾天,小公主遇見一位提著一籃漿果的老太婆。
小公主問:「老婆婆,請問你有沒有看到十一個王子?」
老太婆說:「我沒遇見什麼王子,倒是看到十一隻天鵝,在附近河裡游水。」

公主沿著河走,來到海邊。
天快黑了,她看見遙遠的地方,有十一隻天鵝朝她飛過來。
當太陽沉到海裡,那些天鵝變成英俊的王子,
小公主和哥哥們相認,大家熱烈的互相擁抱。

大哥哥告訴妹妹:「我們白天是天鵝,太陽下山以後才會變回人。
我們住在很遠的王國,從這裡要飛兩天才到,
明天你願意跟我們一起走嗎?」
小公主點點頭說:「好。」

王子們編織了一個大網,讓小公主躺在網裡睡覺。
天一亮,十一個王子變成天鵝,
大家用嘴叼住大網,飛向天空。
在旅途中,最小的哥哥幫小公主準備食物,替她擋住陽光。
十一隻天鵝飛行了一整天,停在海中的一塊礁石上,
這時海上颳起狂風,天空出現了閃電,
大雨淋濕了他們的身體,他們手拉著手,擠在一起。

第二天天亮,哥哥們又變成天鵝,
叼起小公主乘坐的大網,從海中的礁石起飛。
太陽下山的時候,他們來到一個美麗的國度,
十一隻天鵝把大網放在一個大山洞的洞口,
最小的哥哥帶著小公主走進山洞,
對她說:「這就是你的房間,希望你做個好夢。」

晚上小公主夢見一位仙女,
她問仙女,怎麼樣才能幫哥哥們解除魔咒?
仙女說:
「你去摘下蕁麻的莖用腳踩碎,再抽出麻絲,
編織十一件長袖外套,披在哥哥們的身上,就可以解除王后的魔法。
不過蕁麻的毛刺有毒,會讓你痛得無法忍受!
而且只有長在教堂墳地裡的蕁麻,才有用。
同時,在你編織外套的日子裡,不可以開口說話,
如果你開口說話,你的哥哥就會死。」

小公主醒來,記得仙女教她的方法。
她到教堂的墳地,去摘回許多的蕁麻,
她不顧雙手雙腳的疼痛,編織長袖子的外套。

太陽下山以後,十一個哥哥回來了。
他們看到小公主低頭編織著衣服,
手腳都是傷,都吃了一驚!
他們問小公主到底發生什麼事,可是小公主不回答。

有一天早上,小公主正在編織衣服,
忽然一群打獵的人來到山洞前,其中有一個人問小公主:
「我是這個國家的國王,你是誰?,怎麼會住在山洞裡?」
小公主不敢開口說話,國王以為小公主是個啞巴,
但是看見她那麼美麗,忍不住喜歡上她,
就把她帶回王宮,準備娶她做新娘。

國王說:「我幫你把正在編織的衣服都搬過來了。」
小公主不能開口說話,只好用感激的眼神看著國王,
並且拉起國王的手,親了一下。
婚禮過後,全國都很開心,
只有大主教懷疑小公主是巫婆,悄悄的監視著她。
小公主常趁國王睡熟以後,爬下床到另一個小房間去編織衣服。

一天晚上,蕁麻用完了。
為了再摘一些蕁麻,她不能不去教堂的墳地,
她在黑暗中找到那片長滿蕁麻的土地,動手去摘蕁麻,再抱回皇宮。
沒想到,大主教一路都跟著她。
當大主教看見她,深夜一個人走進教堂的墳地,更相信她是一個巫婆。

大主教把他所看到的報告國王,國王越來越不開心。
小公主很想告訴國王真相,
可是為了哥哥們的性命,她只有忍住不說。
小公主拼命的為哥哥們編織外套,
好不容易編完十件,偏偏這時蕁麻又用光了!
她顧不得害怕,決定再到教堂的墳地去摘蕁麻。

這一次,國王和大主教跟在她的背後,
看見她溜進墳地,國王的心碎了!
他相信大主教說的話都是真的。
法官們認定小公主是巫婆,要把她燒死,
他們把她關進牢裡。

黃昏時小公主在牢房,聽到翅膀搧動的聲音,
那是最小的哥哥變成的天鵝,正用翅膀拍打著鐵窗。
但是小公主不能開口說話,只能向最小的哥哥點點頭,
一邊不停的編織著最後一件外套。

要燒死巫婆的消息,很快的傳遍了全國。
小公主坐在一輛破馬車上,雙手不停的忙著編織 
有人罵她是巫婆,要搶走她身邊和手中的衣服。
忽然天空飛下來十一隻天鵝,展開大大的翅膀,保護小公主。

小公主怕織好的蕁麻衣服被人們搶走,
抓起所有的衣服向十一個哥哥扔過去!
那十一隻天鵝立刻變成十一個英俊的王子,
只有最小的哥哥,還留下一隻天鵝的翅膀,
因為他的外套,還有一隻袖子沒有織好。

這時小公主才開口說:「我不是女巫。」
國王知道了事情的經過,才知道自己的王后,
不但不是啞巴,不是巫婆,
而是最仁慈,最堅強的王后。
從此他們過著幸福快樂的生活。